Tangon do Rungus : I Sonit om i Mondou

Varo-po i sonit om i mondou. Boros di mondou, O Odonit, ka di mondou, mintavun-tavun kito-kai, ka di mondou. Boros di sonit, Ba, isai ot gulu, ka di sonit. Boros di mondou, Ikau, ka di mondou.
Manjadi minoub-no i sonit sid somok do vaig om untunai-no dit mondou it sonit dino. Nopongo-po, tutudai-no dau. Novuvu-po om imatai-no di mondou, nga azangi-zangis i sonit, tu minukad sid tana sampai nokorikot sid vaig. Amu nolonuk dot apui i sonit, tu kiakal. Manjadi minodop-odop-no i mondou dino om untunai-no di sonit. Nopongo-po, tutudai-no dau. Novuvu-po, kakazo-no di sonit, nga iso-po i tulang ot amu nosorob.
Boros di sonit, Uruvan-ko-no dino, tu agauk-ko dohon, ka di sonit om gamao-no dau dot uruding i tulang dino. Nopongo-po om unizo-no di sonit, nga banal-ko avantang. Manjadi nokodop-po i sonit, tinakau-no di kara it uruding dino. Manjadi noposik-po it sonit, monguruding-nguruding-no i kara dino sid raan dot monggis. Manjadi minogihim-no it sonit dino do kabou.

Na minindakod-no i kabou dino. Nemot-po dit anak do kara i kabou mindakod, pomoros-no iosido sid ama dau, i boros dau, Nunu-ka inot mamangkamang dino, Ama? ka dit anak do kara. Boros dit ama, Gungguung di onggison beno, Ahat, ka dit ama, dot nokorikot-po i kabou dino om onggipai-no it ontoluv di kara dino, nga liumiadi sampai minatai-no.
Manjadi minatai-po, sinopulan-no di sonit it uruding dau sampai banal-ko otomon it sonit dino.
Iadno dino i tangon di sonit om i mondou.