Tangon do Rungus : I Yuruk-kuruk mogihim do lias

Manjadi varo-po Yuruk-Kuruk dino minodihim do lias, tu gamaon dau do bubu. Topot insan-po kemot do lias om duato-no dau do songkuro-no ot sulung ong agama-no do bubu? ponimpa-nopo i lias dino, i boros dau, Ino-no o sulung-ku diti ong agama-oku-no do bubu, sangmangkok-no ot urongou, ka di lias. Manjadi boros di Yuruk-kuruk, Amu-oku manganu dikau dino, ka di Yuruk-kuruk. Manjadi liumombus-no vagu iosido mamanau.

Manjadi amu songkuro diri nokemot-no vagu iosido do lias. Manjadi dinuat-no vagu dau i lias dot songkuro-no ot sulung ong gamaon do bubu. Topot boros di lias, Bang ioku diti sompinggan-no ot urongou do sulung-ku, ka di lias. Ponimpa-nopo i Yuruk-kuruk, Moku manganu dikau dino, ka di Yuruk-kuruk. Manjadi linumombus-no vagu iosido mamanau.
Manjadi amu songkuro diri varo-no vagu nemot dau do lias sampai dinuat-no dau i lias, i boros dau, Songkuro-no osulung-nu ong gamaon tekau do bubu, ka di Yuruk-kuruk. Manjadi ponimpa-nopo i lias, i boros dau, Bang ioku diti, oponu do sulung dot urongou, ka di lias. Manjadi noining-po di Yuruk-kuruk i iadino, inanu-no dau i lias dino sampai minuli-no iosido sid valai.

Manjadi nokouli-po, ginama-no dau do bubu. Manjadi nopongo-po mangagama, ovito-no dau sid bavang sampai nitaan-no dau i bubu dino. Manjadi tumindal-ogi iosido, mokiahas-no i bubu dino, tu noponu-no do sulung. Manjadi inahas-no di Yuruk-kuruk i bubu dino, tu noponu-no do sulung, do noginisan ot sada do nokosulung. Manjadi nanu-po dau i sulung dino, pataano-no dau i bubu dino. Topot tumindali-ogi iosido, minongodim-no i bubu dino, tu noponu-no vagu do sulung.
Manjadi inahas-no vagu di Yuruk-kuruk i bubu dino. Nanu-po dau isulung dino, nitaan-no vagu dau sid bavang i bubu dino. Topot tumindal-ogi iosido. minongodim-no vagu i bubu, boros di bubu. O Yuruk-kuruk, ahaso-oku-no, ka di bubu dino.
Manjadi boros di Yuruk-kuruk, Osuhul-neno ong amu-ku-no itaan ikau diti, ka di Yuruk-kuruk. Manjadi nisapai no dau i bubu sid govuton. Topot tumolikud-ogi iosido mamanau, minongodim-no vagu i bubu dino, tu noponu-no dot ombolog. Manjadi inovit-no dau i bubu dino muli sid valai sampai nivantai-no dau sid angkat. Topot minahu-ogi iosido sid abai antad sid angkat, minongodim-no i bubu, tu noponu-no dot ikus. Manjadi napangazan-po i Yuruk-kuruk dino, inanu-no dau i bubu dino om ovito-no sid natad do valai om tovunai-no do kazu om tutudai-ogi, nga navu i bubu dino.
Manjadi sodop-po diri, ponginipi-no i Yuruk-kuruk dot varo kabarasan dot ulun tumoronong sid hatod dau. Nokorikot-po it ulun sid hatod dau, pomoros-no dot, O Yuruk-kuruk, bang amu-nu tinutudan i bubu-nu diri, ong alaid-no, kumanis-no o sumulung antava ringgit om nunu-nopo sambarang antava kakanan, nga sumulung-no kavi, sampai kolundu dikau, ka dit inipi di Yuruk-kuruk dino.

Manjadi noposik-po iosido dino, amu-no nokodop-po vagu iosido, tu banal-ko opus di bubu dau. Manjadi kinam-kinam-nopo mongopus i Yuruk-kuruk dino sampai minatai iosido.